صد خطا‌ وار ہیں لیکن یہ جسارت نہیں کی

صد خطا‌ وار ہیں لیکن یہ جسارت نہیں کی

ہم نے خوش رہ کے ترے غم سے خیانت نہیں کی

ہم نے بے سود ترے ساتھ محبت کی ہے

اتنی بے سود کہ پانے کی بھی چاہت نہیں کی

دل کو اس صبر پہ کچھ داد تو دے کہ اس نے

تجھ کو کھو کر بھی مری جان قیامت نہیں کی

وہ جہاں زاد تھا اس نے بھی ستم کم نہ کیے

ہم جنوں زاد تھے ہم نے بھی شکایت نہیں کی

کوئی اک گھاؤ تھا جو شعر نہیں ہو پایا

کوئی اک چوٹ تھی جو دل نے عبارت نہیں کی

وہ جو اک چہرہ تھا آنکھوں کا دلاسہ عباسؔ

ہم نے اس چہرے کی عمروں سے زیارت نہیں کی