safed-posh darindon ne gul khilae the

safed-posh darindoñ ne gul khilā.e the

zamīn surḳh huī sabz karne aa.e the

samajh liyā thā jinheñ maiñ ne raushnī kā safīr

vo āstīn meñ ḳhanjar chhupā ke laa.e the

musāfiroñ ko ghanī chhāñv le ke baiTh ga.ī

daraḳht raah ke donoñ taraf lagā.e the

mujhe bhī chāroñ taraf tishnagī ne dauḌāyā

mirī nigāh pe āb-e-ravāñ ke saa.e the

mujhe ġhurūr hai maiñ dostoñ kī nekī huuñ

unheñ ḳhushī hai ki dariyā meñ Daal aa.e the

mire aziiz the vo qabr khod ke rakh dī

mujhe jo de ga.e miTTī vo sab parā.e the

havā to apnā qarīna badal nahīñ saktī

charāġh aap ne kis zo.am meñ jalā.e the

safed-posh darindon ne gul khilae the

zamin surKH hui sabz karne aae the

samajh liya tha jinhen main ne raushni ka safir

wo aastin mein KHanjar chhupa ke lae the

musafiron ko ghani chhanw le ke baiTh gai

daraKHt rah ke donon taraf lagae the

mujhe bhi chaaron taraf tishnagi ne dauDaya

meri nigah pe aab-e-rawan ke sae the

mujhe ghurur hai main doston ki neki hun

unhen KHushi hai ki dariya mein Dal aae the

mere aziz the wo qabr khod ke rakh di

mujhe jo de gae miTTi wo sab parae the

hawa to apna qarina badal nahin sakti

charagh aap ne kis zoam mein jalae the