sahar ko bhī mirī mahfil meñ barhamī na huī
tamām-rāt huī dard meñ kamī na huī
ġhurūr-e-husn tamannā-e-dil kā dushman thā
vo kaun din thā ki jis din hamāhamī na huī
umañD rahī hai mire dil ke saath barsoñ se
ye koī nahr huī aañkh kī namī na huī
maiñ apne qatl kā shākī nahīñ huā to huā
ye rañj hai ki tire zulm meñ kamī na huī
lahad pe aane kī andāz saikḌoñ the magar
ḳhush aa.ī vaz.a unheñ vo jo mātamī na huī
ulaT ulaT ga.e dil mere intiqāl ke ba.ad
ye kyā ki aap kī zulfoñ meñ barhamī na huī
hazāroñ uTh ga.e āġhosh-e-dahr se lekin
ajiib ghar hai zamāna jahāñ ġhamī na huī
ye jism rūh-e-bahī-ḳhvāh kā rahā dushman
tamām-umr kabhī sulh-e-bāhamī na huī
har ek ke liye khīñchā ravā nahīñ 'sāqib'
bhavoñ kā husn hī kyā hai agar ḳhamī na huī
sahar ko bhi meri mahfil mein barhami na hui
tamam-raat hui dard mein kami na hui
ghurur-e-husn tamanna-e-dil ka dushman tha
wo kaun din tha ki jis din hamahami na hui
umanD rahi hai mere dil ke sath barson se
ye koi nahr hui aankh ki nami na hui
main apne qatl ka shaki nahin hua to hua
ye ranj hai ki tere zulm mein kami na hui
lahad pe aane ki andaz saikDon the magar
KHush aai waza unhen wo jo matami na hui
ulaT ulaT gae dil mere intiqal ke baad
ye kya ki aap ki zulfon mein barhami na hui
hazaron uTh gae aaghosh-e-dahr se lekin
ajib ghar hai zamana jahan ghami na hui
ye jism ruh-e-bahi-KHwah ka raha dushman
tamam-umr kabhi sulh-e-bahami na hui
har ek ke liye khincha rawa nahin 'saqib'
bhawon ka husn hi kya hai agar KHami na hui
Source:
Deewan-e-Saqib (Pg. 317)
-
Author:
Mirza Zakir Husain Qazlibaas Saqib Lucknowvi
-
- Edition: 1998
- Publisher: Urdu Acadami U.P.
- Year of Publication: 1998
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.