sahar-o-sham meri dur ki aahaT jaise

sahar-o-shām mirī duur kī aahaT jaise

bistar-e-ḳhvāb pe jaagī huī karvaT jaise

ik tasanno' hai ki sab jiite haiñ jī lenā hai

zindagī tere baġhair ek banāvaT jaise

tirī palkeñ haiñ ki jis tarah sipar Daale koī

tirī āñkheñ haiñ tirī pyaas kā panghaT jaise

ungliyāñ kāñptī haiñ chuTkiyāñ jal uThtī haiñ

aaj tak husn ke chehre pe ho ghūñghaT jaise

kis ko mā'lūm thā nāmūs-e-jabīñ kā anjām

ek duniyā huī mujh ko tirī chaukhaT jaise

raushnī chhantī huī aas ke kāshāne se

koī bhūle se khulā chhoḌ gayā paT jaise

'shāz' naġhmoñ pe shab-e-vasl kā nuur utrā hai

us kī peshānī pe bāloñ kī koī laT jaise

sahar-o-sham meri dur ki aahaT jaise

bistar-e-KHwab pe jagi hui karwaT jaise

ek tasanno' hai ki sab jite hain ji lena hai

zindagi tere baghair ek banawaT jaise

teri palken hain ki jis tarah sipar Dale koi

teri aankhen hain teri pyas ka panghaT jaise

ungliyan kanpti hain chuTkiyan jal uThti hain

aaj tak husn ke chehre pe ho ghunghaT jaise

kis ko ma'lum tha namus-e-jabin ka anjam

ek duniya hui mujh ko teri chaukhaT jaise

raushni chhanti hui aas ke kashane se

koi bhule se khula chhoD gaya paT jaise

'shaz' naghmon pe shab-e-wasl ka nur utra hai

us ki peshani pe baalon ki koi laT jaise