sahra mein marunga na chaman ja ke marunga

sahrā meñ marūñgā na chaman jā ke marūñgā

is kūcha-e-dushnām meñ hī aa ke marūñgā

e'zāz hai ulfat ke marāhil se guzarnā

iThlā.ūñgā itrā.ūñgā lahrā ke marūñgā

kahte haiñ mujhe log ḳhudāvand-e-mohabbat

so hukm-e-vafā husn ko farmā ke marūñgā

maiñ husn nahīñ 'ishq huuñ phir bhī sar-e-mahfil

sad-nāz-o-adā dilbarī dikhlā ke marūñgā

is baar marūñgā maiñ na.ī 'umr kī ḳhātir

is baar to marne kā sila pā ke marūñgā

maiñ mar bhī chukā kab se nahīñ māntā koī

ḳhud laash ko apnī kahīñ dafnā ke marūñgā

us zūd-farāmosh kī aamad bhī hai imshab

ruk dast-e-qazā aaj maiñ kal aa ke marūñgā

ġhairoñ kī 'ināyāt bhī kholūñgā maiñ tujh par

apnoñ ke sabhī daav bhī samjhā ke marūñgā

dīvār meñ chunvā do mujhe shauq se lekin

har dil ko baġhāvat pe maiñ uksā ke marūñgā

zinda huuñ 'amar' karb-e-musalsal meñ abhī tak

maiñ apne gunāhoñ kī sazā pā ke marūñgā

sahra mein marunga na chaman ja ke marunga

is kucha-e-dushnam mein hi aa ke marunga

e'zaz hai ulfat ke marahil se guzarna

iThlaunga itraunga lahra ke marunga

kahte hain mujhe log KHudawand-e-mohabbat

so hukm-e-wafa husn ko farma ke marunga

main husn nahin 'ishq hun phir bhi sar-e-mahfil

sad-naz-o-ada dilbari dikhla ke marunga

is bar marunga main nai 'umr ki KHatir

is bar to marne ka sila pa ke marunga

main mar bhi chuka kab se nahin manta koi

KHud lash ko apni kahin dafna ke marunga

us zud-faramosh ki aamad bhi hai imshab

ruk dast-e-qaza aaj main kal aa ke marunga

ghairon ki 'inayat bhi kholunga main tujh par

apnon ke sabhi daw bhi samjha ke marunga

diwar mein chunwa do mujhe shauq se lekin

har dil ko baghawat pe main uksa ke marunga

zinda hun 'amar' karb-e-musalsal mein abhi tak

main apne gunahon ki saza pa ke marunga