sahra sameT len ye samundar sameT len

sahrā sameT leñ ye samundar sameT leñ

āñkheñ tamām pyaas ke manzar sameT leñ

ai sub.h thoḌī der kī mohlat ki rāhgīr

jaate haiñ bas ye raat kā bistar sameT leñ

har sub.h ḳhud ko jism ke bāhar bikher kar

har shaam ḳhud ko jism ke andar sameT leñ

sar par is āsmān ke hone se fā.eda

behtar hai ye phaTī huī chādar sameT leñ

hañste haiñ ham ko dekh ke ahl-e-qafas magar

par phaḌphaḌā.e jā.eñge kyā par sameT leñ

is ḳhāmushī meñ aaj bhī vus'at hai is qadar

baḌh kar havā-e-vaqt kī sarsar sameT leñ

sahra sameT len ye samundar sameT len

aankhen tamam pyas ke manzar sameT len

ai subh thoDi der ki mohlat ki rahgir

jate hain bas ye raat ka bistar sameT len

har subh KHud ko jism ke bahar bikher kar

har sham KHud ko jism ke andar sameT len

sar par is aasman ke hone se faeda

behtar hai ye phaTi hui chadar sameT len

hanste hain hum ko dekh ke ahl-e-qafas magar

par phaDphaDae jaenge kya par sameT len

is KHamushi mein aaj bhi wus'at hai is qadar

baDh kar hawa-e-waqt ki sarsar sameT len