sailabon ke baad hum aise diwane ho jate hain

sailāboñ ke ba.ad ham aise dīvāne ho jaate haiñ

apne ghar se us ke ghar tak pahroñ dauḌ lagāte haiñ

ham ne apne haath zamīñ meñ daab rakhe haiñ is Dar se

dast-e-talab phailāne vaale dīvāne kahlāte haiñ

un āñkhoñ kī sevā kar ke ham ne jaadū siikh liyā

jab bhī tabī.at ghabrātī hai patthar ke ho jaate haiñ

apne hijr kī baat alag hai apnā ishq musalsal hai

ḳhud se bichhaḌne lagte haiñ to us ke ghar ho aate haiñ

aadhī raat ko hastī kā mafhūm samajh meñ aatā hai

bām-o-dar ke sannāTe jab aapas meñ Takrāte haiñ

jaane kitnī gard jamī ho ḳhadd-o-ḳhāl pe rastoñ kī

is Dar se ham apne ghar meñ dastak de kar jaate haiñ

ab us par ilzām rakhe ye ḳhalq-e-ḳhudā to kyā kahiye

ham to us kī bāteñ kar ke apnā dil bahlāte haiñ

jis din us kī yaad aatī hai jiit sī apnī hotī hai

rasta rasta kūcha kūcha parcham se lahrāte haiñ

pahle purvā.ī se dil meñ ek kasak sī uThtī thī

ab ye mausam kuchh nahīñ karte lekin ḳhvāb dikhāte haiñ

maiñ ne apne josh meñ aa kar raqs kiyā thā ḳhud 'mohsin'

lekin merī bastī vaale us kā naam batāte haiñ

sailabon ke baad hum aise diwane ho jate hain

apne ghar se us ke ghar tak pahron dauD lagate hain

hum ne apne hath zamin mein dab rakhe hain is Dar se

dast-e-talab phailane wale diwane kahlate hain

un aankhon ki sewa kar ke hum ne jadu sikh liya

jab bhi tabiat ghabraati hai patthar ke ho jate hain

apne hijr ki baat alag hai apna ishq musalsal hai

KHud se bichhaDne lagte hain to us ke ghar ho aate hain

aadhi raat ko hasti ka mafhum samajh mein aata hai

baam-o-dar ke sannaTe jab aapas mein Takraate hain

jaane kitni gard jami ho KHadd-o-KHal pe raston ki

is Dar se hum apne ghar mein dastak de kar jate hain

ab us par ilzam rakhe ye KHalq-e-KHuda to kya kahiye

hum to us ki baaten kar ke apna dil bahlate hain

jis din us ki yaad aati hai jit si apni hoti hai

rasta rasta kucha kucha parcham se lahraate hain

pahle purwai se dil mein ek kasak si uThti thi

ab ye mausam kuchh nahin karte lekin KHwab dikhate hain

main ne apne josh mein aa kar raqs kiya tha KHud 'mohsin'

lekin meri basti wale us ka nam batate hain