sajda-e-shaiKH pe laghzish ka guman hota hai

sajda-e-shaiḳh pe laġhzish kā gumāñ hotā hai

merī mastī pe parastish kā gumāñ hotā hai

ham-nashīñ tujh se vo sadmāt uThā.e haiñ ki ab

mehrbānī pe bhī sāzish kā gumāñ hotā hai

vaqt-o-māhaul kā hālāt kā ḳhamyāza hai

jis pe saaqī kī navāzish kā gumāñ hotā hai

pas-e-chilman haiñ to chilman ko uThā hī diije

is takalluf pe numā.ish kā gumāñ hotā hai

baat kyā hai ki tire ḳhat ke har ik jumle par

apne andāz-e-nigārish kā gumāñ hotā hai

un ke chehre kī ziyā hai ki mire dil kī chamak

kuchh to hai jis pe ye tābish kā gumāñ hotā hai

gardish-e-chashm nahīñ gardish-e-daurāñ hai 'kamāl'

jis pe paimānoñ kī gardish kā gumāñ hotā hai

sajda-e-shaiKH pe laghzish ka guman hota hai

meri masti pe parastish ka guman hota hai

ham-nashin tujh se wo sadmat uThae hain ki ab

mehrbani pe bhi sazish ka guman hota hai

waqt-o-mahaul ka haalat ka KHamyaza hai

jis pe saqi ki nawazish ka guman hota hai

pas-e-chilman hain to chilman ko uTha hi dije

is takalluf pe numaish ka guman hota hai

baat kya hai ki tere KHat ke har ek jumle par

apne andaz-e-nigarish ka guman hota hai

un ke chehre ki ziya hai ki mere dil ki chamak

kuchh to hai jis pe ye tabish ka guman hota hai

gardish-e-chashm nahin gardish-e-dauran hai 'kamal'

jis pe paimanon ki gardish ka guman hota hai