samajh ghar yar ka main shah-nashin-e-dil ko dhota hun

samajh ghar yaar kā maiñ shah-nashīn-e-dil ko dhotā huuñ

kaheñ haiñ log dīvāne ki dīvāna huuñ rotā huuñ

bujhā.e ashk ye ḳhuuñ ke jo favvāre uchhalte haiñ

mizha se yaar ke le nashtar āñkhoñ meñ chubhotā huuñ

madad ai ḳhizr-e-girya ġharq kariyo nāv-e-dil aaj hī

ye hai Dubvāne vaalā maiñ ise pahle Dubotā huuñ

but-e-sañgīn dil kī dekh tasvīr āñkheñ pathrā.īñ

ThiThuk huuñ naqsh-e-qālīñ sā na rotā huuñ na sotā huuñ

maiñ kū-e-maikashān-o-mahvashāñ ke muttasil pahuñchā

ḳhabar-dār ai harīfo ab havās-o-hosh khotā huuñ

mabādā mere gul-rū kā gul-e-ruḳhsār murjhāve

phuvār ai 'azfarī' de āñsuoñ kī maiñ bhigotā huuñ

samajh ghar yar ka main shah-nashin-e-dil ko dhota hun

kahen hain log diwane ki diwana hun rota hun

bujhae ashk ye KHun ke jo fawware uchhalte hain

mizha se yar ke le nashtar aankhon mein chubhota hun

madad ai KHizr-e-girya gharq kariyo naw-e-dil aaj hi

ye hai Dubwane wala main ise pahle Dubota hun

but-e-sangin dil ki dekh taswir aankhen pathrain

ThiThuk hun naqsh-e-qalin sa na rota hun na sota hun

main ku-e-maikashan-o-mahwashan ke muttasil pahuncha

KHabar-dar ai harifo ab hawas-o-hosh khota hun

mabaada mere gul-ru ka gul-e-ruKHsar murjhawe

phuwar ai 'azfari' de aansuon ki main bhigota hun