sar-e-mahfil taKHatub mohtaram karna paDega

sar-e-mahfil taḳhātub mohtaram karnā paḌegā

ye maiñ tū kā ta'alluq aap ham karnā paḌegā

raheñge is tarah luTne pe ham tayyār kab tak

hameñ kuchh jazba-e-īsār kam karnā paḌegā

mire ḳhāliq safar terī taraf kī vāpsī kā

mujhe be-jism ho kar be-qadam karnā paḌegā

zamīñ par āsmāñ kā is jagah mehvar hai shāyad

sitāroñ kī tarah tauf-e-haram karnā paḌegā

mohabbat meñ hamārā dil bikhartā jā rahā hai

kisī sūrat hameñ is ko baham karnā paḌegā

ka.ī din tak ravā rakhnī paḌegī sust-kārī

kisī din kaam koī ek dam karnā paḌegā

bahut ġhāfil hai paanī bilbilātī tishnagī se

samundar ab hameñ sahrā meñ zam karnā paḌegā

mire andar kiye jā dam-ba-dam sarshār mujh ko

tujhe mujh par musalsal ye karam karnā paḌegā

yahāñ jo mā'bad-e-haq meñ sharākat chāhtā hai

hameñ be-daḳhl har aisā sanam karnā paḌegā

agar tārīḳh likhnī hai simaTte jangaloñ kī

to koī ik shajar 'āsim' qalam karnā paḌegā

sar-e-mahfil taKHatub mohtaram karna paDega

ye main tu ka ta'alluq aap hum karna paDega

rahenge is tarah luTne pe hum tayyar kab tak

hamein kuchh jazba-e-isar kam karna paDega

mere KHaliq safar teri taraf ki wapsi ka

mujhe be-jism ho kar be-qadam karna paDega

zamin par aasman ka is jagah mehwar hai shayad

sitaron ki tarah tauf-e-haram karna paDega

mohabbat mein hamara dil bikharta ja raha hai

kisi surat hamein is ko baham karna paDega

kai din tak rawa rakhni paDegi sust-kari

kisi din kaam koi ek dam karna paDega

bahut ghafil hai pani bilbilati tishnagi se

samundar ab hamein sahra mein zam karna paDega

mere andar kiye ja dam-ba-dam sarshaar mujh ko

tujhe mujh par musalsal ye karam karna paDega

yahan jo ma'bad-e-haq mein sharakat chahta hai

hamein be-daKHl har aisa sanam karna paDega

agar tariKH likhni hai simaTte jangalon ki

to koi ek shajar 'asim' qalam karna paDega