sar-e-mimbar wo KHwabon ke mahal tamir karte hain

sar-e-mimbar vo ḳhvāboñ ke mahal tā'mīr karte haiñ

'ilāj-e-ġham nahīñ karte faqat taqrīr karte haiñ

bahar-ālam ḳhudā kā shukr kiije un kā kahnā hai

ḳhatā karte haiñ ham jo shikva-e-taqdīr karte haiñ

hamārī shā'irī meñ dil dhaḌaktā hai zamāne kā

vo nālāñ haiñ hamārī log kyoñ tauqīr karte haiñ

unheñ ḳhushnūdī-e-shāhāñ kā daa.im paas rahtā hai

ham apne she'r se logoñ ke dil tasḳhīr karte haiñ

hamāre zehn par chhā.e nahīñ haiñ hirs ke saa.e

jo ham mahsūs karte haiñ vahī tahrīr karte haiñ

bane phirte haiñ kuchh aise bhī shā'ir is zamāne meñ

sanā 'ġhālib' kī karte haiñ na zikr-e-'mīr' karte haiñ

hasīn āñkhoñ madhur gītoñ ke sundar des ko kho kar

maiñ hairāñ huuñ vo zikr-e-vādī-e-kashmīr karte haiñ

hamāre dard kā 'jālib' mudāvā ho nahīñ saktā

ki har qātil ko chārāgar se ham tā'bīr karte haiñ

sar-e-mimbar wo KHwabon ke mahal ta'mir karte hain

'ilaj-e-gham nahin karte faqat taqrir karte hain

bahar-alam KHuda ka shukr kije un ka kahna hai

KHata karte hain hum jo shikwa-e-taqdir karte hain

hamari sha'iri mein dil dhaDakta hai zamane ka

wo nalan hain hamari log kyon tauqir karte hain

unhen KHushnudi-e-shahan ka daim pas rahta hai

hum apne she'r se logon ke dil tasKHir karte hain

hamare zehn par chhae nahin hain hirs ke sae

jo hum mahsus karte hain wahi tahrir karte hain

bane phirte hain kuchh aise bhi sha'ir is zamane mein

sana 'ghaalib' ki karte hain na zikr-e-'mir' karte hain

hasin aankhon madhur giton ke sundar des ko kho kar

main hairan hun wo zikr-e-wadi-e-kashmir karte hain

hamare dard ka 'jalib' mudawa ho nahin sakta

ki har qatil ko chaaragar se hum ta'bir karte hain