سر جھکا دے جس جگہ پر تیرا دیوانہ ابھی

سر جھکا دے جس جگہ پر تیرا دیوانہ ابھی

بت کدہ بھی ہو تو بن جائے خدا خانہ ابھی

دل میں باقی ہے اگر جذب کلیمانہ ابھی

دیکھئے گا ہر جگہ پر نور جانانہ ابھی

وہ نظر آتے ہیں مجھ کو بے حجابانہ ابھی

جذب دل رہنے دے کچھ دن اور دیوانہ ابھی

ماسوا سے بے خبر ہے اور بیگانہ ابھی

جستجو میں تیری سر گرداں ہے دیوانہ ابھی

کیوں نہ ہر لمحہ فزوں ہو جوش رندانہ ابھی

مل رہی ہے ان سے پیمانہ بہ پیمانہ ابھی

کہہ رہا ہے مست ہو کر تیرا مستانہ ابھی

رقص میں ساغر ہے گردش میں ہے پیمانہ ابھی

اک کرن جلوے کی تیرے روئے جانانہ ابھی

کر گئی ہوش و خرد سے مجھ کو بیگانہ ابھی

ہوش میں اپنے ہے کچھ کچھ تیرا دیوانہ ابھی

اے نگاہ ناز کوئی اور پیمانہ ابھی

تیرے ہاتھوں سے اگر ملتے رہیں جام و سبو

ہر قدم پر ڈال دیں بنیاد مے خانہ ابھی

تیرے ہی جلووں سے ہیں معمور یہ دیر و حرم

کعبہ دیکھا دیکھ آئے جا کے بت خانہ ابھی

دل تو پہلے ہی سے ان کو دے چکے ہیں اے شفیعؔ

ایک باقی رہ گیا ہے سر کا نذرانہ ابھی