سرنگوں حسن پہ ہو عشق سرافراز نہ ہو

سرنگوں حسن پہ ہو عشق سرافراز نہ ہو

لن ترانی کا سر طور یہی راز نہ ہو

ہم سمجھنے ہی سے معذور رہے ہوں شاید

لب پہ غنچے کے کہیں تیری ہی آواز نہ ہو

پردہ در پردہ حجابات میں رہنے والے

غیر ممکن ہے کہ جب سوز تو ہو ساز نہ ہو

باغ عالم میں یہ آوارگیٔ نکہت گل

تیری زلفوں کے حسیں کیف کا اعجاز نہ ہو

عشق رنگین بتا دیتا ہے دنیائے حیات

مستیٔ حسن نظر کا تری اعجاز نہ ہو

تیرے دیوانۂ الفت کے لئے موزوں ہے

ایسا عالم جو کسی اور کا دم ساز نہ ہو

جوہرؔ اس آئنہ رخسار کی محفل میں کہیں

اضطرابی دل بے تاب کی غماز نہ ہو