sar pe dast-e-dua charagh ka hai

sar pe dast-e-du'ā charāġh kā hai

ye bhī ik mo'jiza charāġh kā hai

ye jo raushan haiñ ḳhāl-o-ḳhad mere

mujh se ik rābta charāġh kā hai

hukm ye hai ki nange-pāñv chalo

kyūñki ye rāsta charāġh kā hai

raushnī ab mujhe gale se lagā

aur tujhe vāsta charāġh kā hai

ye jo raushan hai aañkh chehre par

asl meñ aabla charāġh kā hai

yā to ye dāstān hai us kī

yā koī vāqi'a charāġh kā hai

aaj phir us kā sāmnā hai aur

darmiyāñ fāsla charāġh kā hai

roz jaltā hai roz bujhtā hai

kis qadar hausla charāġh kā hai

sar pe dast-e-du'a charagh ka hai

ye bhi ek mo'jiza charagh ka hai

ye jo raushan hain KHal-o-KHad mere

mujh se ek rabta charagh ka hai

hukm ye hai ki nange-panw chalo

kyunki ye rasta charagh ka hai

raushni ab mujhe gale se laga

aur tujhe wasta charagh ka hai

ye jo raushan hai aankh chehre par

asl mein aabla charagh ka hai

ya to ye dastan hai us ki

ya koi waqi'a charagh ka hai

aaj phir us ka samna hai aur

darmiyan fasla charagh ka hai

roz jalta hai roz bujhta hai

kis qadar hausla charagh ka hai