سر پہ جس کے ردا نہیں ہوتی

سر پہ جس کے ردا نہیں ہوتی

وہ زمیں پارسا نہیں ہوتی

نم تو ہوتی ہے آنکھ بادل کی

آب دیدہ ہوا نہیں ہوتی

خواہشوں کے قصور ہوتے ہیں

آدمی سے خطا نہیں ہوتی

صرف پتھر گناہ کرتے ہیں

آئنوں سے خطا نہیں ہوتی

التجا تو اگر نہیں سنتا

میرے لب پر دعا نہیں ہوتی

زندگی کی دعائیں مت دیجے

اس سے بڑھ کر سزا نہیں ہوتی

گھر کے جلتے ہوئے چراغوں سے

کیا سبب ہے ضیا نہیں ہوتی

تیرگی کے حریف موسم میں

روشنی جا بہ جا نہیں ہوتی