sara-e-bud mein bahta hun Dhalta jata hun

sarā-e-būd meñ bahtā huuñ Dhaltā jaatā huuñ

koī bulātā nahīñ aur maiñ chaltā jaatā huuñ

abhī vahīñ kā vahīñ huuñ badan kī ghaaT pe maiñ

hazār paanī pe paanī badaltā jaatā huuñ

bahut rukī huī shāmoñ meñ chal rahā huuñ kahīñ

bahut bujhe hue logoñ meñ jaltā jaatā huuñ

hijāb āb-o-havā se haTā sakūñ shāyad

maiñ dast-o-pā pe jo miTTī sī maltā jaatā huuñ

abhī maiñ Thiik kahīñ bhī bapā nahīñ hotā

so vahshateñ hī nibhātā huuñ Taltā jaatā huuñ

koī makāñ hai jo be-daḳhl kar rahā hai mujhe

koī galī hai ki jis se nikaltā jaatā huuñ

ye ḳhvāb dekhne vāloñ kā qāfila hai so maiñ

isī ġhubār meñ chup-chāp chaltā jaatā huuñ

sara-e-bud mein bahta hun Dhalta jata hun

koi bulata nahin aur main chalta jata hun

abhi wahin ka wahin hun badan ki ghaT pe main

hazar pani pe pani badalta jata hun

bahut ruki hui shamon mein chal raha hun kahin

bahut bujhe hue logon mein jalta jata hun

hijab aab-o-hawa se haTa sakun shayad

main dast-o-pa pe jo miTTi si malta jata hun

abhi main Thik kahin bhi bapa nahin hota

so wahshaten hi nibhata hun Talta jata hun

koi makan hai jo be-daKHl kar raha hai mujhe

koi gali hai ki jis se nikalta jata hun

ye KHwab dekhne walon ka qafila hai so main

isi ghubar mein chup-chap chalta jata hun