sarab dekhta hun main ki aab dekhta hun main

sarāb dekhtā huuñ maiñ ki aab dekhtā huuñ maiñ

samajh meñ jo na aa sake vo ḳhvāb dekhtā huuñ maiñ

lahūñ meñ tairtī hai koī shai tirī umiid sī

ugā huā shafaq meñ āftāb dekhtā huuñ maiñ

mirī nazar ke sāmne hai aa.ina rakkhā huā

tirī nazar kā husn-e-intiḳhāb dekhtā huuñ maiñ

ye kis maqām par hai aaj raḳhsh-e-fikr-o-āgahī

ki jibra.īl ko bhī ham-rikāb dekhtā huuñ maiñ

ye koī nazr to nahīñ nigāh dil navāz kī

khilā huā jo dil meñ ik gulāb dekhtā huuñ maiñ

kisī kā dāman-e-talab kushāda is qadar nahīñ

tirī atā ko be-had-o-hisāb dekhtā huuñ maiñ

samajh sakegā kaun ai ḳhudā tirī kitāb ko

badal gayā hai sab kā sab nisāb dekhtā huuñ maiñ

abhī to sun rahā huuñ maiñ gaḌhī huī kahāniyāñ

khulegā kab haqīqatoñ kā baab dekhtā huuñ maiñ

dil-o-nazar kī raushnī hai jis ke harf harf meñ

rakhī huī vo taaq par kitāb dekhtā huuñ maiñ

jo khelne meñ tez thā navāb ho gayā hai vo

paḌhe likhe ko ḳhasta-o-ḳharāb dekhtā huuñ maiñ

vo hoshiyār aadmī ki jāgtā hai raat din

kabhī kabhī use bhī mast-e-ḳhvāb dekhtā huuñ maiñ

jo 'māhir'-e-alam-zada ke lab pe aa ga.ī hañsī

tū khā rahā hai koī pech-o-tāb dekhtā huuñ maiñ

sarab dekhta hun main ki aab dekhta hun main

samajh mein jo na aa sake wo KHwab dekhta hun main

lahun mein tairti hai koi shai teri umid si

uga hua shafaq mein aaftab dekhta hun main

meri nazar ke samne hai aaina rakkha hua

teri nazar ka husn-e-intiKHab dekhta hun main

ye kis maqam par hai aaj raKHsh-e-fikr-o-agahi

ki jibrail ko bhi ham-rikab dekhta hun main

ye koi nazr to nahin nigah dil nawaz ki

khila hua jo dil mein ek gulab dekhta hun main

kisi ka daman-e-talab kushada is qadar nahin

teri ata ko be-had-o-hisab dekhta hun main

samajh sakega kaun ai KHuda teri kitab ko

badal gaya hai sab ka sab nisab dekhta hun main

abhi to sun raha hun main gaDhi hui kahaniyan

khulega kab haqiqaton ka bab dekhta hun main

dil-o-nazar ki raushni hai jis ke harf harf mein

rakhi hui wo taq par kitab dekhta hun main

jo khelne mein tez tha nawab ho gaya hai wo

paDhe likhe ko KHasta-o-KHarab dekhta hun main

wo hoshiyar aadmi ki jagta hai raat din

kabhi kabhi use bhi mast-e-KHwab dekhta hun main

jo 'mahir'-e-alam-zada ke lab pe aa gai hansi

tu kha raha hai koi pech-o-tab dekhta hun main