sard-mehr logon se shoKHiyan nahin rakhna

sard-mehr logoñ se shoḳhiyāñ nahīñ rakhnā

rābte baḌhā.eñ to talḳhiyāñ nahīñ rakhnā

har taraf zamāne ke kaan kār-farmā haiñ

aa.ine kī muTThī meñ hichkiyāñ nahīñ rakhnā

kaun kitnā muḳhlis hai vaqt ḳhud batā degā

dost aur dushman kī gintiyāñ nahīñ rakhnā

us safar se aakar phir ik safar salāmat hai

āsmān se kah do saḳhtiyāñ nahīñ rakhnā

ghūñT ghūñT pī lenā hijr ko mohabbat meñ

ishq kī adālat meñ peshiyāñ nahīñ rakhnā

jis se bhī kahīñ milnā muskurā ke mil lenā

zaat ke jazīre meñ talḳhiyāñ nahīñ rakhnā

jis ke sard lahje meñ silvaTeñ numāyāñ hoñ

dekho aise qadmoñ meñ pagḌiyāñ nahīñ rakhnā

sard-mehr logon se shoKHiyan nahin rakhna

rabte baDhaen to talKHiyan nahin rakhna

har taraf zamane ke kan kar-farma hain

aaine ki muTThi mein hichkiyan nahin rakhna

kaun kitna muKHlis hai waqt KHud bata dega

dost aur dushman ki gintiyan nahin rakhna

us safar se aakar phir ek safar salamat hai

aasman se kah do saKHtiyan nahin rakhna

ghunT ghunT pi lena hijr ko mohabbat mein

ishq ki adalat mein peshiyan nahin rakhna

jis se bhi kahin milna muskura ke mil lena

zat ke jazire mein talKHiyan nahin rakhna

jis ke sard lahje mein silwaTen numayan hon

dekho aise qadmon mein pagDiyan nahin rakhna