سرد مہر لوگوں سے شوخیاں نہیں رکھنا

سرد مہر لوگوں سے شوخیاں نہیں رکھنا

رابطے بڑھائیں تو تلخیاں نہیں رکھنا

ہر طرف زمانے کے کان کار فرما ہیں

آئنے کی مٹھی میں ہچکیاں نہیں رکھنا

کون کتنا مخلص ہے وقت خود بتا دے گا

دوست اور دشمن کی گنتیاں نہیں رکھنا

اس سفر سے آکر پھر اک سفر سلامت ہے

آسمان سے کہہ دو سختیاں نہیں رکھنا

گھونٹ گھونٹ پی لینا ہجر کو محبت میں

عشق کی عدالت میں پیشیاں نہیں رکھنا

جس سے بھی کہیں ملنا مسکرا کے مل لینا

ذات کے جزیرے میں تلخیاں نہیں رکھنا

جس کے سرد لہجے میں سلوٹیں نمایاں ہوں

دیکھو ایسے قدموں میں پگڑیاں نہیں رکھنا