sarguzisht apni raqam karte rahe

sarguzisht apnī raqam karte rahe

aap kahte aur ham karte rahe

bazm-e-sāqī se uThāne kī hameñ

koshisheñ duniyā ke ġham karte rahe

sub.h-o-shām-o-roz-o-shab allāh se

terī bāteñ ai sanam karte rahe

zindagī bhartī rahī jām-e-sifāl

ham use pī pī ke kam karte rahe

Dālte aañsū kisī par kyā asar

beshtar dāman hī nam karte rahe

be-bas-o-majbūr kar detā hai ishq

ham gavārā har sitam karte rahe

hañs ke Tarḳhānā kabhī bhūle nahīñ

vo hamesha ye karam karte rahe

sarguzisht apni raqam karte rahe

aap kahte aur hum karte rahe

bazm-e-saqi se uThane ki hamein

koshishen duniya ke gham karte rahe

subh-o-sham-o-roz-o-shab allah se

teri baaten ai sanam karte rahe

zindagi bharti rahi jam-e-sifal

hum use pi pi ke kam karte rahe

Dalte aansu kisi par kya asar

beshtar daman hi nam karte rahe

be-bas-o-majbur kar deta hai ishq

hum gawara har sitam karte rahe

hans ke TarKHana kabhi bhule nahin

wo hamesha ye karam karte rahe