sau kirdar nibhane paDte hain hum ko

sau kirdār nibhāne paḌte haiñ ham ko

kyā kyā bhes banāne paḌte haiñ ham ko

āḳhir tak ham be-chehra ho jaate haiñ

itne ruup sajāne paḌte haiñ ham ko

ḳhadd-o-ḳhāl se sab zāhir ho jaatā hai

ḳhadd-o-ḳhāl chhupāne paḌte haiñ ham ko

rafta-rafta har shai se kaT jaate haiñ

itne rabt nibhāne paḌte haiñ ham ko

ham ḳhud par har baar bharosa karte haiñ

dukh har baar uThāne paḌte haiñ ham ko

apne zaḳhm ginānā kitnā mushkil hai

apne zaḳhm gināne paḌte haiñ ham ko

sahrā kī vīrānī se dahshat khā kar

kitne shahr basāne paḌte haiñ ham ko

saarī raat sulagte rahte haiñ taare

saarī raat bujhāne paḌte haiñ ham ko

sau kirdar nibhane paDte hain hum ko

kya kya bhes banane paDte hain hum ko

aaKHir tak hum be-chehra ho jate hain

itne rup sajaane paDte hain hum ko

KHadd-o-KHal se sab zahir ho jata hai

KHadd-o-KHal chhupane paDte hain hum ko

rafta-rafta har shai se kaT jate hain

itne rabt nibhane paDte hain hum ko

hum KHud par har bar bharosa karte hain

dukh har bar uThane paDte hain hum ko

apne zaKHm ginana kitna mushkil hai

apne zaKHm ginane paDte hain hum ko

sahra ki virani se dahshat kha kar

kitne shahr basane paDte hain hum ko

sari raat sulagte rahte hain tare

sari raat bujhane paDte hain hum ko