sauda-e-sajda sham-o-sahar mere sar mein hai

saudā-e-sajda shām-o-sahar mere sar meñ hai

ai but kashish kuchh aisī tire sañg-e-dar meñ hai

maiñ kab huuñ ye mirā tan-e-be-jāñ hazar meñ hai

rūh-e-ravān-e-qālib-e-tan to safar meñ hai

ye ek asar to adviya-e-chāragar meñ hai

shiddat ab aur bhī mire dard-e-jigar meñ hai

saudā-e-ishq zulf-e-siyah jis ke sar meñ hai

kab mutlaq imtiyāz use nafā o zarar meñ hai

kyā aa.egā kisī but-e-shīrīñ-dahan pe dil

kyuuñ mīThā mīThā dard hamāre jigar meñ hai

chheḌā mujhe ki nuuh kā tūfāñ bapā huā

ik bahr-e-ashk band mirī chashm-e-tar meñ hai

pahuñchā kisī ko sadma ki ham loTne lage

saare jahāñ kā dard hamāre jigar meñ hai

nok-e-mizha kā rahne lagā dil meñ phir ḳhayāl

shiddat kī Tiis phir mire zaḳhm-e-jigar meñ hai

saudā-e-zulf-e-yār meñ hai dard-e-sar zarūr

ik ḳhaas lutf bhī magar is dard-e-sar meñ hai

merā ye naḳhl-e-dil bhī hai āzād misl-e-sarv

gul is shajar meñ hai na samar is shajar meñ hai

chāhe to lā-makāñ kī bhī le aa.e ye ḳhabar

ye zor tā.er-e-dil-e-be-bāl-o-par meñ hai

dushnām se bhī yaar kī aatī hai bū-e-lutf

kuchh shak nahīñ ki ḳhair nihāñ us ke shar meñ hai

kuchh shak nahīñ ki qurb-e-qayāmat kī hai dalīl

ye fitna o fasād ki ab bahr o bar meñ hai

ho us se mere dīda-e-tar kā muqābla

'ranjūr' is kī taab kahāñ abr-e-tar meñ hai

sauda-e-sajda sham-o-sahar mere sar mein hai

ai but kashish kuchh aisi tere sang-e-dar mein hai

main kab hun ye mera tan-e-be-jaan hazar mein hai

ruh-e-rawan-e-qalib-e-tan to safar mein hai

ye ek asar to adwiya-e-chaaragar mein hai

shiddat ab aur bhi mere dard-e-jigar mein hai

sauda-e-ishq zulf-e-siyah jis ke sar mein hai

kab mutlaq imtiyaz use nafa o zarar mein hai

kya aaega kisi but-e-shirin-dahan pe dil

kyun miTha miTha dard hamare jigar mein hai

chheDa mujhe ki nuh ka tufan bapa hua

ek bahr-e-ashk band meri chashm-e-tar mein hai

pahuncha kisi ko sadma ki hum loTne lage

sare jahan ka dard hamare jigar mein hai

nok-e-mizha ka rahne laga dil mein phir KHayal

shiddat ki Tis phir mere zaKHm-e-jigar mein hai

sauda-e-zulf-e-yar mein hai dard-e-sar zarur

ek KHas lutf bhi magar is dard-e-sar mein hai

mera ye naKHl-e-dil bhi hai aazad misl-e-sarw

gul is shajar mein hai na samar is shajar mein hai

chahe to la-makan ki bhi le aae ye KHabar

ye zor taer-e-dil-e-be-baal-o-par mein hai

dushnam se bhi yar ki aati hai bu-e-lutf

kuchh shak nahin ki KHair nihan us ke shar mein hai

kuchh shak nahin ki qurb-e-qayamat ki hai dalil

ye fitna o fasad ki ab bahr o bar mein hai

ho us se mere dida-e-tar ka muqabla

'ranjur' is ki tab kahan abr-e-tar mein hai