sayyaad bata to sahi is jal mein kya hai

sayyād batā to sahī is jaal meñ kyā hai

gar dil nahīñ merā to tire baal meñ kyā hai

vaise to ḳhud is chāñd kā qaa.il huuñ maiñ lekin

ik raushnī ko chhoḌ kar is thaal meñ kyā hai

majnūñ hī batā saktā hai lailā kī fazīlat

yā sohnī se pūchh ki mahivāl meñ kyā hai

maiñ hashr ke maidān meñ kah dūñgā mohabbat

pūchhegā ḳhudā jab tire a.amāl meñ kyā hai

jī kartā hai un ko tirī tasvīr dikhā duuñ

jo pūchhte haiñ mujh se ki bañgāl meñ kyā hai

allāh banā de mire ashkoñ ko kabūtar

sab pūchh rahe haiñ tire rūmāl meñ kyā hai

sayyaad bata to sahi is jal mein kya hai

gar dil nahin mera to tere baal mein kya hai

waise to KHud is chand ka qail hun main lekin

ek raushni ko chhoD kar is thaal mein kya hai

majnun hi bata sakta hai laila ki fazilat

ya sohni se puchh ki mahiwal mein kya hai

main hashr ke maidan mein kah dunga mohabbat

puchhega KHuda jab tere aamal mein kya hai

ji karta hai un ko teri taswir dikha dun

jo puchhte hain mujh se ki bangal mein kya hai

allah bana de mere ashkon ko kabutar

sab puchh rahe hain tere rumal mein kya hai