sehr kaisa ye nai rut ne kiya dharti par

sehr kaisā ye na.ī rut ne kiyā dhartī par

muddatoñ baad koī phuul khilā dhartī par

jaane is kurra-e-tārīk meñ hai nuur kahāñ

jaane kis aañkh meñ hai ḳhvāb tirā dhartī par

āsmānoñ se ḳhamoshī bhī kabhī nāzil kar

roz karte ho nayā hashr bapā dhartī par

āsmānoñ meñ ulajhte ho siyah abr se kyuuñ

aa faqīroñ kī tarah ḳhaak uḌā dhartī par

ab bhī hiltā hai mirā naḳhl-e-badan sar-tā-pā

ab bhī chaltī hai havasnāk havā dhartī par

koī āvāz kahīñ se bhī nahīñ aatī hai

qāf-tā-qāf hai kaisā ye ḳhalā dhartī par

ab bhī vābasta haiñ ummīdeñ tumhīñ se ham ko

ab bhī hotī hai tirī hamd o sanā dhartī par

hijr kī zard havā yūñhī agar chaltī rahe

ek bhī peḌ rahegā na harā dhartī par

sehr kaisa ye nai rut ne kiya dharti par

muddaton baad koi phul khila dharti par

jaane is kurra-e-tarik mein hai nur kahan

jaane kis aankh mein hai KHwab tera dharti par

aasmanon se KHamoshi bhi kabhi nazil kar

roz karte ho naya hashr bapa dharti par

aasmanon mein ulajhte ho siyah abr se kyun

aa faqiron ki tarah KHak uDa dharti par

ab bhi hilta hai mera naKHl-e-badan sar-ta-pa

ab bhi chalti hai hawasnak hawa dharti par

koi aawaz kahin se bhi nahin aati hai

qaf-ta-qaf hai kaisa ye KHala dharti par

ab bhi wabasta hain ummiden tumhin se hum ko

ab bhi hoti hai teri hamd o sana dharti par

hijr ki zard hawa yunhi agar chalti rahe

ek bhi peD rahega na hara dharti par