shah-surKHi mein kisi roz jo pata hai mujhe

shāh-surḳhī meñ kisī roz jo paatā hai mujhe

vo na us din kā phir aḳhbār dikhātā hai mujhe

huuñ 'adad aur 'adad zarb dilātā hai mujhe

hindsa mujh sā hī taqsīm karātā hai mujhe

yaad aa jaatā hai vo shāḳh pe har dam khilnā

ghar ke guldān meñ jab koī sajātā hai mujhe

jis jagah aa ke har ik rāsta kho jaatā hai

hausla merā vahāñ raah dikhātā hai mujhe

itnā mashshāq huā aaj vo apne fan meñ

āñkhoñ āñkhoñ hī meñ vo mujh se churātā hai mujhe

qaul-e-zarrīñ huuñ likhā shahr kī dīvāroñ par

jo bhī aatā hai vo paḌhtā huā jaatā hai mujhe

yuuñ to aate haiñ mirī samt hazāroñ patthar

chūmtā huuñ use jo zaḳhm lagātā hai mujhe

haañ bikhar jaatā huuñ TuuTe hue shīshe kī tarah

jab bhī nā-qadr koī haath lagātā hai mujhe

naqsh-e-an-miT huuñ maiñ tārīḳh uThā kar dekho

ḳhud hī miT jaatā hai jo koī miTātā hai mujhe

maiñ balāoñ meñ ghirā rahtā huuñ 'rā'nā' lekin

bas ḳhudā hai jo har aafat se bachātā hai mujhe

shah-surKHi mein kisi roz jo pata hai mujhe

wo na us din ka phir aKHbar dikhata hai mujhe

hun 'adad aur 'adad zarb dilata hai mujhe

hindsa mujh sa hi taqsim karaata hai mujhe

yaad aa jata hai wo shaKH pe har dam khilna

ghar ke guldan mein jab koi sajata hai mujhe

jis jagah aa ke har ek rasta kho jata hai

hausla mera wahan rah dikhata hai mujhe

itna mashshaq hua aaj wo apne fan mein

aankhon aankhon hi mein wo mujh se churaata hai mujhe

qaul-e-zarrin hun likha shahr ki diwaron par

jo bhi aata hai wo paDhta hua jata hai mujhe

yun to aate hain meri samt hazaron patthar

chumta hun use jo zaKHm lagata hai mujhe

han bikhar jata hun TuTe hue shishe ki tarah

jab bhi na-qadr koi hath lagata hai mujhe

naqsh-e-an-miT hun main tariKH uTha kar dekho

KHud hi miT jata hai jo koi miTata hai mujhe

main balaon mein ghira rahta hun 'ra'na' lekin

bas KHuda hai jo har aafat se bachata hai mujhe