sham-e-wahshat is tarah ho ehtimam-e-zindagi

shām-e-vahshat is tarah ho ehtimām-e-zindagī

ek jām-e-marg ho aur ho banām-e-zindagī

maut aa.ī hai mujhe dars-e-fanā dete hue

lauh-e-marqad par mirī likhiye payām-e-zindagī

is se pahle yuuñ na thā par aap se milne ke baa'd

ham pe lāzim ho gayā hai ehtirām-e-zindagī

ho ga.ī muñh-zor kitnī gardish-e-raḳhsh-e-hayāt

haath se chhuTne lagī hai ye lagām-e-zindagī

mai pilā.ī thī kisī ne chashm-e-ḳhum se ek baar

raas aayā hī nahīñ phir koī jām-e-zindagī

zindagī kī ik ramaq bhī mujh meñ ab baaqī nahīñ

bas bikharne ko hai ab merā nizām-e-zindagī

ek hī sūrat bachī hai ab baqā-e-zīst kī

yaar ke pahlū meñ guzre sub.h o shām-e-zindagī

ḳhuub chāra-sāzī hai ye ‘āshiq-e-bīmār kī

us ne bhejā hai dam-e-āḳhir salām-e-zindagī

lo huī is naqsh-e-fānī kī kahānī ḳhatm-shud

chhin gayā ham se hamārā har maqām-e-zindagī

sham-e-wahshat is tarah ho ehtimam-e-zindagi

ek jam-e-marg ho aur ho banam-e-zindagi

maut aai hai mujhe dars-e-fana dete hue

lauh-e-marqad par meri likhiye payam-e-zindagi

is se pahle yun na tha par aap se milne ke ba'd

hum pe lazim ho gaya hai ehtiram-e-zindagi

ho gai munh-zor kitni gardish-e-raKHsh-e-hayat

hath se chhuTne lagi hai ye lagam-e-zindagi

mai pilai thi kisi ne chashm-e-KHum se ek bar

ras aaya hi nahin phir koi jam-e-zindagi

zindagi ki ek ramaq bhi mujh mein ab baqi nahin

bas bikharne ko hai ab mera nizam-e-zindagi

ek hi surat bachi hai ab baqa-e-zist ki

yar ke pahlu mein guzre subh o sham-e-zindagi

KHub chaara-sazi hai ye ‘ashiq-e-bimar ki

us ne bheja hai dam-e-aKHir salam-e-zindagi

lo hui is naqsh-e-fani ki kahani KHatm-shud

chhin gaya hum se hamara har maqam-e-zindagi