sham ki rah dekhta hun main

shaam kī raah dekhtā huuñ maiñ

ek jaltā huā diyā huuñ maiñ

terā kahnā ki bevafā huuñ maiñ

apnī nazroñ se gir gayā huuñ maiñ

maiñ tumheñ ghar pe mil nahīñ saktā

ḳhud se milne kahīñ chalā huuñ maiñ

mat samajh mujh ko mohsin-e-girdāb

ek kashtī kā nā-ḳhudā huuñ maiñ

terī manzil hai rāsta merā

yaad rakh terā rahnumā huuñ maiñ

saarī maḳhlūq mujh pe hairāñ hai

kuchh farishtoñ kā ratjagā huuñ maiñ

ek būḌhā shajar ye kahtā hai

kuchh parindoñ kā aasrā huuñ maiñ

merī golī ġhalat lagī tum ko

dushmanoñ se nahīñ milā huuñ maiñ

sāqiyā qā.ede sikhā mujh ko

mai-kade meñ abhī nayā huuñ maiñ

jitne tere haiñ chāhne vaale

yaad rakh sab se hī sivā huuñ meñ

aable paañv meñ to haiñ 'farhat'

phir bhī manzil tak aa gayā huuñ maiñ

sham ki rah dekhta hun main

ek jalta hua diya hun main

tera kahna ki bewafa hun main

apni nazron se gir gaya hun main

main tumhein ghar pe mil nahin sakta

KHud se milne kahin chala hun main

mat samajh mujh ko mohsin-e-girdab

ek kashti ka na-KHuda hun main

teri manzil hai rasta mera

yaad rakh tera rahnuma hun main

sari maKHluq mujh pe hairan hai

kuchh farishton ka ratjaga hun main

ek buDha shajar ye kahta hai

kuchh parindon ka aasra hun main

meri goli ghalat lagi tum ko

dushmanon se nahin mila hun main

saqiya qaede sikha mujh ko

mai-kade mein abhi naya hun main

jitne tere hain chahne wale

yaad rakh sab se hi siwa hun mein

aable panw mein to hain 'farhat'

phir bhi manzil tak aa gaya hun main