shane ki har zaban se sune koi laf-e-zulf

shāne kī har zabāñ se sune koī lāf-e-zulf

chīre hai siina raat ko ye mū-shigāf-e-zulf

jis tarah se ki kaabe pe hai poshish-e-siyāh

is tarah is sanam ke hai ruḳh par ġhilāf-e-zulf

barham hai is qadar jo mire dil se zulf-e-yār

shāmat-zada ne kyā kiyā aisā ḳhilāf-e-zulf

matlab na kufr o diiñ se na dair o haram se kaam

kartā hai dil tavāf-e-izār o tavāf-e-zulf

nāf-e-ġhazāl-e-chīñ hai ki hai nāfa-e-tatār

kyūñkar kahūñ ki hai girah-e-zulf nāf-e-zulf

aapas meñ aaj dast-o-garebāñ hai roz o shab

ai mehr-vash zarī kā nahīñ mū-e-bāf-e-zulf

kahtā hai koī jiim koī laam zulf ko

kahtā huuñ maiñ 'zafar' ki musattah hai kāf-e-zulf

shane ki har zaban se sune koi laf-e-zulf

chire hai sina raat ko ye mu-shigaf-e-zulf

jis tarah se ki kabe pe hai poshish-e-siyah

is tarah is sanam ke hai ruKH par ghilaf-e-zulf

barham hai is qadar jo mere dil se zulf-e-yar

shamat-zada ne kya kiya aisa KHilaf-e-zulf

matlab na kufr o din se na dair o haram se kaam

karta hai dil tawaf-e-izar o tawaf-e-zulf

naf-e-ghazal-e-chin hai ki hai nafa-e-tatar

kyunkar kahun ki hai girah-e-zulf naf-e-zulf

aapas mein aaj dast-o-gareban hai roz o shab

ai mehr-wash zari ka nahin mu-e-baf-e-zulf

kahta hai koi jim koi lam zulf ko

kahta hun main 'zafar' ki musattah hai kaf-e-zulf