shayad jhulas raha hai gul-e-pairahan abhi

shāyad jhulas rahā hai gul-e-pairahan abhī

mahsūs ho rahī hai havā meñ ghuTan abhī

Takrā gayā thā raah meñ jo ahl-e-fan abhī

chhū kar maiñ aa rahā huuñ usī ke charan abhī

madfan ġhamoñ kā dil ko banāyā to hai magar

badlā nahīñ hai aap kā tarz-e-suḳhan abhī

shāyad ki bhūlā sub.h kā ghar aa.e lauT kar

karte haiñ intizār kisī ke nayan abhī

Dar hai ki jazb ho na kahīñ dil kī raushnī

shām-e-siyah se maañg lī ġham kī kiran abhī

dār-o-rasan se aaj bhī aatī hai ye sadā

barq-e-sitam kī zad meñ hai saarā chaman abhī

'irfāñ' ke dil ko aap ne dekhā to hai magar

dekhā nahīñ hai aap ne dīvāna-pan abhī

shayad jhulas raha hai gul-e-pairahan abhi

mahsus ho rahi hai hawa mein ghuTan abhi

Takra gaya tha rah mein jo ahl-e-fan abhi

chhu kar main aa raha hun usi ke charan abhi

madfan ghamon ka dil ko banaya to hai magar

badla nahin hai aap ka tarz-e-suKHan abhi

shayad ki bhula subh ka ghar aae lauT kar

karte hain intizar kisi ke nayan abhi

Dar hai ki jazb ho na kahin dil ki raushni

sham-e-siyah se mang li gham ki kiran abhi

dar-o-rasan se aaj bhi aati hai ye sada

barq-e-sitam ki zad mein hai sara chaman abhi

'irfan' ke dil ko aap ne dekha to hai magar

dekha nahin hai aap ne diwana-pan abhi