shab-e-gham yaad unki aa rahi hai

shab-e-ġham yaad un kī aa rahī hai

charāġh-e-dil kī lau tharrā rahī hai

bayān-e-dost nāseh kī zabāñ se

tabī.at aur machlī jā rahī hai

kahāñ naqsh-e-kaf-e-pā DhūñDte ho

sadā-e-pā to dil se aa rahī hai

baḌe dil-kash haiñ duniyā ke ḳham o pech

nazar meñ zulf sī lahrā rahī hai

huī muddat ki dil ātish-zada thā

fuġhāñ se aaj tak aañch aa rahī hai

shab-e-va.ada ḳhayāloñ ke ufuq par

gurezāñ sī ziyā tharrā rahī hai

mohabbat ko kahāñ tāb-e-nazāra

javānī aap hī sharmā rahī hai

sukūt-e-shām kī pahnā.iyoñ se

sadā us ajnabī kī aa rahī hai

shab-e-gham yaad un ki aa rahi hai

charagh-e-dil ki lau tharra rahi hai

bayan-e-dost naseh ki zaban se

tabiat aur machli ja rahi hai

kahan naqsh-e-kaf-e-pa DhunDte ho

sada-e-pa to dil se aa rahi hai

baDe dil-kash hain duniya ke KHam o pech

nazar mein zulf si lahra rahi hai

hui muddat ki dil aatish-zada tha

fughan se aaj tak aanch aa rahi hai

shab-e-wada KHayalon ke ufuq par

gurezan si ziya tharra rahi hai

mohabbat ko kahan tab-e-nazara

jawani aap hi sharma rahi hai

sukut-e-sham ki pahnaiyon se

sada us ajnabi ki aa rahi hai