shab-e-tarik mein paida sahar karna bhi aata hai

shab-e-tārīk meñ paidā sahar karnā bhī aatā hai

hameñ dāġh-e-jigar ko jalva-gar karnā bhī aatā hai

badal jaatī haiñ jab ham se nigāheñ shādmānī kī

hameñ nā-shādmānī meñ basar karnā bhī aatā hai

tarab kī shāh-rāheñ band ho jaatī haiñ jab ham par

sar-e-rāh-e-alam chal kar safar karnā bhī aatā hai

ġhubār-e-kārvāñ—barsar haiñ rāhoñ meñ magar ham ko

ġhurūr-e-ham-rahāñ ko pai-sipar karnā bhī aatā hai

bachāte haiñ nigāheñ ḳhaak ke zarroñ se bhī lekin

hameñ aflāk par naqd-o-nazar karnā bhī aatā hai

jo din kaTte nahīñ taqdīr ke zer-e-asar ham se

unheñ tadbīr ke zer-e-asar karnā bhī aatā hai

sujūd-e-bandagī kī nā-pazīrā.ī kī ġhairat se

jabīn-e-shauq ko bezār-e-dar karnā bhī aatā hai

ġhurūr-e-chāra-gar jab dard kī had se guzar jaa.e

hameñ itlāq-e-darmāñ dard par karnā bhī aatā hai

zamāne ke buland-o-past ke narġhe meñ haiñ lekin

zamāne ko hameñ zer-o-zabar karnā bhī aatā hai

nazar ko Thokaroñ meñ rakhne vaalo jalva-gāhoñ meñ

hameñ jalvoñ ko pāmāl-e-nazar karnā bhī aatā hai

milā kar apnī qismat ke sitāre ḳhaak meñ 'bismil'

hameñ zarroñ ko ḳhurshīd-o-qamar karnā bhī aatā hai

shab-e-tarik mein paida sahar karna bhi aata hai

hamein dagh-e-jigar ko jalwa-gar karna bhi aata hai

badal jati hain jab hum se nigahen shadmani ki

hamein na-shadmani mein basar karna bhi aata hai

tarab ki shah-rahen band ho jati hain jab hum par

sar-e-rah-e-alam chal kar safar karna bhi aata hai

ghubar-e-karwan—barsar hain rahon mein magar hum ko

ghurur-e-ham-rahan ko pai-sipar karna bhi aata hai

bachate hain nigahen KHak ke zarron se bhi lekin

hamein aflak par naqd-o-nazar karna bhi aata hai

jo din kaTte nahin taqdir ke zer-e-asar hum se

unhen tadbir ke zer-e-asar karna bhi aata hai

sujud-e-bandagi ki na-pazirai ki ghairat se

jabin-e-shauq ko bezar-e-dar karna bhi aata hai

ghurur-e-chaara-gar jab dard ki had se guzar jae

hamein itlaq-e-darman dard par karna bhi aata hai

zamane ke buland-o-past ke narghe mein hain lekin

zamane ko hamein zer-o-zabar karna bhi aata hai

nazar ko Thokaron mein rakhne walo jalwa-gahon mein

hamein jalwon ko pamal-e-nazar karna bhi aata hai

mila kar apni qismat ke sitare KHak mein 'bismil'

hamein zarron ko KHurshid-o-qamar karna bhi aata hai