shab-e-wada kah gai hai shab-e-gham daraaz rakhna

shab-e-va.ada kah ga.ī hai shab-e-ġham darāz rakhnā

ise maiñ bhī raaz rakkhūñ ise tum bhī raaz rakhnā

ye hai ḳhaar ḳhaar vaadī yūñhī zaḳhm zaḳhm chalnā

ye hai pattharoñ kī bastī yūñhī dil-e-gudāz rakhnā

hama-tan junūñ huuñ phir bhī rahe kuchh to parda-dārī

ki burā nahīñ ḳhirad se koī sāz-bāz rakhnā

mire nāḳhun-e-vafā par koī qarz rah na jaa.e

tire dil meñ jo girah hai use nīm-bāz rakhnā

vahī lai jo an-sunī bhī vahī 'shāz' naġhmagī bhī

ye hisāb-e-ḳhāmushī bhī mire nai-navāz rakhnā

shab-e-wada kah gai hai shab-e-gham daraaz rakhna

ise main bhi raaz rakkhun ise tum bhi raaz rakhna

ye hai KHar KHar wadi yunhi zaKHm zaKHm chalna

ye hai pattharon ki basti yunhi dil-e-gudaz rakhna

hama-tan junun hun phir bhi rahe kuchh to parda-dari

ki bura nahin KHirad se koi saz-baz rakhna

mere naKHun-e-wafa par koi qarz rah na jae

tere dil mein jo girah hai use nim-baz rakhna

wahi lai jo an-suni bhi wahi 'shaz' naghmagi bhi

ye hisab-e-KHamushi bhi mere nai-nawaz rakhna