yaad karne ko yun to kya kuchh hai

yaad karne ko yuuñ to kyā kuchh hai

kab hamārā jiyā huā kuchh hai

aur to kuchh nahīñ hamāre paas

par tumhārā chhuā huā kuchh hai

ek hī vāqi.a thā phir bhī yaad

tum ko kuchh mujh ko dūsrā kuchh hai

itnā māhir hai duniyā-dārī meñ

sochtā kuchh hai boltā kuchh hai

apnī palkoñ ko muuñd le nādāñ

sāmne kuchh hai dekhtā kuchh hai

andarūñ roz mujh se kahtā hai

jiite jaane se mudda.ā kuchh hai ?

maut jab aa.ī tab huā ma.alūm

bujhtī āñkhoñ meñ ḳhvāb sā kuchh hai

us ko jab dekhte hue dekhā

tab khulā ham pe dekhnā kuchh hai

soch lete haiñ us ko vaqt-ba-vaqt

jiite rahne meñ fā.eda kuchh hai

tum ne dekhā hai haal duniyā kā

tum ko lagtā hai kyā ḳhudā kuchh hai ?

yaad karne ko yun to kya kuchh hai

kab hamara jiya hua kuchh hai

aur to kuchh nahin hamare pas

par tumhaara chhua hua kuchh hai

ek hi waqia tha phir bhi yaad

tum ko kuchh mujh ko dusra kuchh hai

itna mahir hai duniya-dari mein

sochta kuchh hai bolta kuchh hai

apni palkon ko mund le nadan

samne kuchh hai dekhta kuchh hai

andarun roz mujh se kahta hai

jite jaane se muddaa kuchh hai ?

maut jab aai tab hua malum

bujhti aankhon mein KHwab sa kuchh hai

us ko jab dekhte hue dekha

tab khula hum pe dekhna kuchh hai

soch lete hain us ko waqt-ba-waqt

jite rahne mein faeda kuchh hai

tum ne dekha hai haal duniya ka

tum ko lagta hai kya KHuda kuchh hai ?