شب کی پلکوں پہ ہوں ٹھہرے ہوئے آنسو کی طرح

شب کی پلکوں پہ ہوں ٹھہرے ہوئے آنسو کی طرح

صبح ہوتے ہی میں کھو جاؤں گا جگنو کی طرح

دیکھ سکتا نہیں محسوس تو کر سکتا ہوں

مجھ میں تحلیل ہوا ہے کوئی خوشبو کی طرح

رقص کرتا ہے مرے دل کے شبستاں میں کوئی

اور صدا آتی ہے بجتے ہوئے گھنگھرو کی طرح

میری خوشبو ہی پریشان کئے ہے مجھ کو

دل کے صحرا میں بھٹکتا ہوں میں آہو کی طرح

میرے حالات ہی خود مجھ کو بنا دیتے ہیں

کبھی شعلہ کبھی شبنم کبھی آنسو کی طرح

خلوت شب ہو کہ جلوت کی حسیں محفل ہو

ہم نے محسوس کیا ہے اسے خوشبو کی طرح

دھوپ میں آتا ہے جب اس کا تصور افضلؔ

میرے احساس پہ چھا جاتا ہے گیسو کی طرح