shab zara der se guzregi na ghabra ai dil

shab zarā der se guzregī na ghabrā ai dil

sub.h ḳhud hogī numūdār Thahar jā ai dil

kho ga.ī gesū-e-jānāñ ki ghanī chhāñv kahāñ

har taraf dhuup kā taptā huā sahrā ai dil

kūcha-e-yār meñ aa.e the kin ummīdoñ se

luT ga.ī aa ke yahāñ shauq kī duniyā ai dil

kaisī shorish sī bapā hai kabhī chal kar dekheñ

qatl-gāhoñ meñ hai ye kaisā tamāshā ai dil

mausam-e-gul hai ye kaisā ki chaman hairāñ hai

har kalī phuul kā dil jaise ki merā ai dil

dushman-e-jāñ haiñ sabhī saare ke saare qātil

tū bhī is bhiiḌ meñ kuchh der Thahar jā ai dil

shab zara der se guzregi na ghabra ai dil

subh KHud hogi numudar Thahar ja ai dil

kho gai gesu-e-jaanan ki ghani chhanw kahan

har taraf dhup ka tapta hua sahra ai dil

kucha-e-yar mein aae the kin ummidon se

luT gai aa ke yahan shauq ki duniya ai dil

kaisi shorish si bapa hai kabhi chal kar dekhen

qatl-gahon mein hai ye kaisa tamasha ai dil

mausam-e-gul hai ye kaisa ki chaman hairan hai

har kali phul ka dil jaise ki mera ai dil

dushman-e-jaan hain sabhi sare ke sare qatil

tu bhi is bhiD mein kuchh der Thahar ja ai dil