shabab-e-nau-damida par fida hone ka waqt aaya

shabāb-e-nau-damīda par fidā hone kā vaqt aaya

ḳhudā ke naam se nā-āshnā hone kā vaqt aaya

tirī zulfoñ ke saaya se judā hone kā vaqt aaya

phir apne baḳht par mātam-sarā hone kā vaqt aaya

asīrān-e-qafas naġhma-sarā hone kā vaqt aaya

vo maut aa.ī vo hastī se rihā hone kā vaqt aaya

naved-e-vasl denā vo mujhe palkoñ ke saaye meñ

do 'ālam kī hadoñ se māvarā hone kā vaqt aaya

qadam kuchh ukhḌe ukhḌe se nazar kuchh bahkī bahkī sī

shabāb aaya hai yā mahshar bapā hone kā vaqt aaya

mire pahlū meñ vo añgḌā.ī le kar kasmasā uTThe

sarāpā dil sarāsar mudda'ā hone kā vaqt aaya

masīhā sar jhukā kar uTh gayā 'bismil' kī bālīñ se

ḳhudā-hāfiz ki ab mahv-e-du’ā hone kā vaqt aaya

shabab-e-nau-damida par fida hone ka waqt aaya

KHuda ke nam se na-ashna hone ka waqt aaya

teri zulfon ke saya se juda hone ka waqt aaya

phir apne baKHt par matam-sara hone ka waqt aaya

asiran-e-qafas naghma-sara hone ka waqt aaya

wo maut aai wo hasti se riha hone ka waqt aaya

nawed-e-wasl dena wo mujhe palkon ke saye mein

do 'alam ki hadon se mawara hone ka waqt aaya

qadam kuchh ukhDe ukhDe se nazar kuchh bahki bahki si

shabab aaya hai ya mahshar bapa hone ka waqt aaya

mere pahlu mein wo angDai le kar kasmasa uTThe

sarapa dil sarasar mudda'a hone ka waqt aaya

masiha sar jhuka kar uTh gaya 'bismil' ki baalin se

KHuda-hafiz ki ab mahw-e-du’a hone ka waqt aaya