shahr-dar-shahr usi aag ka Dar hota hai

shahr-dar-shahr usī aag kā Dar hotā hai

jis sharāre kā tire lab se guzar hotā hai

talḳhiyāñ dauḌtī phirtī haiñ lahū meñ jin ke

aisī nazroñ meñ kahāñ husn-e-nazar hotā hai

zāviye fikr ke andāz-e-bayāñ kā jaadū

ham-kalāmī kī adā ek hunar hotā hai

bazm-ārā.ī se āñkhoñ meñ kaTī haiñ rāteñ

ik na.ī sub.h kā āġhāz magar hotā hai

chāñd āñgan meñ utar aaya hai ġhamgīñ ho kar

niiñd par bār-e-garāñ pichhlā pahar hotā hai

qāfile jab bhī chale haiñ to gumāñ par hī chale

aur manzil ke yaqīñ par hī safar hotā hai

uljhaneñ DhūñDhtī rahtī haiñ sabab uljhan kā

zehn-e-insān se kis kis kā guzar hotā hai

vo filistīn ho baġhdād yā bastī koī

rāzdāñ sab kā yahāñ āb-e-ḳhizar hotā hai

roz kyoñ qatl huā kartā hai ḳhurshīd yahāñ

roz kyoñ chaak garebān-e-sahar hotā hai

maiñ rivāyāt se mahfūz huuñ kyoñ ki shāhid

Thahre paanī meñ kahāñ koī bhañvar hotā hai

shahr-dar-shahr usi aag ka Dar hota hai

jis sharare ka tere lab se guzar hota hai

talKHiyan dauDti phirti hain lahu mein jin ke

aisi nazron mein kahan husn-e-nazar hota hai

zawiye fikr ke andaz-e-bayan ka jadu

ham-kalami ki ada ek hunar hota hai

bazm-arai se aankhon mein kaTi hain raaten

ek nai subh ka aaghaz magar hota hai

chand aangan mein utar aaya hai ghamgin ho kar

nind par bar-e-garan pichhla pahar hota hai

qafile jab bhi chale hain to guman par hi chale

aur manzil ke yaqin par hi safar hota hai

uljhanen DhunDhti rahti hain sabab uljhan ka

zehn-e-insan se kis kis ka guzar hota hai

wo filistin ho baghdad ya basti koi

raazdan sab ka yahan aab-e-KHizar hota hai

roz kyon qatl hua karta hai KHurshid yahan

roz kyon chaak gareban-e-sahar hota hai

main riwayat se mahfuz hun kyon ki shahid

Thahre pani mein kahan koi bhanwar hota hai