shahr-e-ashob mein ulfat ki zaban bolti hun

shahr-e-āshob meñ ulfat kī zabāñ boltī huuñ

par jahāñ bolnā hotā hai vahāñ boltī huuñ

tū ne dekhī hai abhī lab pe mire mohr-e-sukūt

tū ne dekhā hī kahāñ jab mirī jaañ boltī huuñ

nutq baḳhshā hai mujhe rab ne 'atā himmat kī

chāhe zālim pe bahut guzre girāñ boltī huuñ

merī ḳhāmoshī pe jab jashn manāne lage vo

phir bhalā chup kahāñ rahtī hai zabāñ boltī huuñ

kaam jab ‘ishva-tarāzī kī zabāñ aatī nahīñ

sang pighlāne ko ashkoñ kī zabāñ boltī huuñ

aañkh se aañkh ho jab mahv-e-takallum 'nasrīn'

phir zabāñ khultī kahāñ hai maiñ kahāñ boltī huuñ

shahr-e-ashob mein ulfat ki zaban bolti hun

par jahan bolna hota hai wahan bolti hun

tu ne dekhi hai abhi lab pe mere mohr-e-sukut

tu ne dekha hi kahan jab meri jaan bolti hun

nutq baKHsha hai mujhe rab ne 'ata himmat ki

chahe zalim pe bahut guzre giran bolti hun

meri KHamoshi pe jab jashn manane lage wo

phir bhala chup kahan rahti hai zaban bolti hun

kaam jab ‘ishwa-taraazi ki zaban aati nahin

sang pighlane ko ashkon ki zaban bolti hun

aankh se aankh ho jab mahw-e-takallum 'nasrin'

phir zaban khulti kahan hai main kahan bolti hun