shahr mein jab bhi zuleKHa se KHaridar aae

shahr meñ jab bhī zuleḳhā se ḳharīdār aa.e

kitne yūsuf the ki ḳhud hī sar-e-bāzār aa.e

chheḌ dī qāmat-o-gesū kī hikāyat ham ne

kisī sūrat se to zikr-e-rasan-o-dār aa.e

jab bhī zindāñ meñ asīroñ ko milā muzhda-e-gul

merī nazroñ meñ tumhāre lab-o-ruḳhsār aa.e

dūsrī rāh-e-vafā meñ koī manzil hī na thī

jo tirī bazm se uTThe vo sar-e-dār aa.e

jab kyā tark-e-tamannā kā irāda ham ne

sāmne kitne hī TuuTe hue pindār aa.e

hosh-mandoñ ne sajā lī ġham-e-dil kī mahfil

ham se dīvāne sar-e-anjuman-e-dār aa.e

ham se sīkhe koī ādāb qadah-noshī ke

ham ki maiḳhāne meñ ġhāfil ga.e hoshiyār aa.e

ġhaur se dekh suḳhan-fahmoñ ke chehre 'sarshār'

kitne is shakl meñ 'ġhālib' ke taraf-dār aa.e

shahr mein jab bhi zuleKHa se KHaridar aae

kitne yusuf the ki KHud hi sar-e-bazar aae

chheD di qamat-o-gesu ki hikayat hum ne

kisi surat se to zikr-e-rasan-o-dar aae

jab bhi zindan mein asiron ko mila muzhda-e-gul

meri nazron mein tumhaare lab-o-ruKHsar aae

dusri rah-e-wafa mein koi manzil hi na thi

jo teri bazm se uTThe wo sar-e-dar aae

jab kya tark-e-tamanna ka irada hum ne

samne kitne hi TuTe hue pindar aae

hosh-mandon ne saja li gham-e-dil ki mahfil

hum se diwane sar-e-anjuman-e-dar aae

hum se sikhe koi aadab qadah-noshi ke

hum ki maiKHane mein ghafil gae hoshiyar aae

ghaur se dekh suKHan-fahmon ke chehre 'sarshaar'

kitne is shakl mein 'ghaalib' ke taraf-dar aae