شمع سے یہ کہہ رہی ہے خاک پروانہ ابھی

شمع سے یہ کہہ رہی ہے خاک پروانہ ابھی

رات آخر ہو گئی باقی ہے افسانہ ابھی

ختم ہو جائے گی اس کے بعد تفسیر حیات

زندگی کہنے کو ہے اک اور افسانہ ابھی

بال تو آ ہی گیا اب ٹوٹنے کی دیر ہے

اور اک صدمے کا ہے محتاج پیمانہ ابھی

قید پینے کی نہیں پی کر بہکنا جرم ہے

ہم نے سمجھا ہی نہیں دستور مے خانہ ابھی

آج تو شاید تھکے ہاروں کی منزل آ گئی

اور تھوڑی دور چل اے عزم مردانہ ابھی

اس کے ہاتھوں سے کہیں دامن چھڑایا جائے گا

تم نے دیکھا ہی نہیں ہے کوئی دیوانہ ابھی

دیکھ اے رہرو پہنچنا ہے حریم ناز تک

کعبہ روکے گا تجھے روکے گا بت خانہ ابھی

ذہن میں اب بھی ابھر آتے ہیں دیرینہ نقوش

ہنستے ہنستے رو لیا کرتا ہے دیوانہ ابھی

تو غم دنیا سے اے مخمورؔ گھبراتا ہے کیوں

تیری جانب ہے نگاہ پیر مے خانہ ابھی