sham mein soz ki wo KHu hai na parwane mein

sham' meñ soz kī vo ḳhū hai na parvāne meñ

jo hai ai barq-shamā.il tire dīvāne meñ

lutf thā zikr-e-dil-soḳhta duhrāne meñ

soz hai saaz kahāñ tuur ke afsāne meñ

thā jo us chashm-e-fusūñ-sāz ke paimāne meñ

kaif vo DhūñDiye ab kaun hai maiḳhāne meñ

vāsta dast-e-nigārīñ kā tujhe ai qātil

ek surḳhī kī kamī hai mire afsāne meñ

jo kabhī thā vahī hai aaj bhī afsāna-e-ishq

ek do lafz badal jaate haiñ duhrāne meñ

maut bhī munhasir in kī nigah-e-nāz pe thī

ab nahīñ koī kamī 'ishq ke afsāne meñ

vahī shai jo abhī miinā meñ thī ik mauj-e-nashāt

vahī tūfān-e-tarab ban ga.ī paimāne meñ

qaul vā'iz kā bajā shaiḳh kī talqīn durust

dil-e-kāfir kahīñ aa.e bhī to samjhāne meñ

qaid-e-hastī ko samajhtā hai junūñ kī tauhīn

ab to kuchh hosh ke andāz haiñ dīvāne meñ

shukr ban jaate haiñ aate hī zabāñ tak shikve

jaane kyā baat hai us aañkh ke sharmāne meñ

kis tarah hazrat-e-vā'iz ko ye samjhā.ūñ 'rashīd'

riñd kyā dekh liyā karte haiñ paimāne meñ

sham' mein soz ki wo KHu hai na parwane mein

jo hai ai barq-shamail tere diwane mein

lutf tha zikr-e-dil-soKHta duhrane mein

soz hai saz kahan tur ke afsane mein

tha jo us chashm-e-fusun-saz ke paimane mein

kaif wo DhunDiye ab kaun hai maiKHane mein

wasta dast-e-nigarin ka tujhe ai qatil

ek surKHi ki kami hai mere afsane mein

jo kabhi tha wahi hai aaj bhi afsana-e-ishq

ek do lafz badal jate hain duhrane mein

maut bhi munhasir in ki nigah-e-naz pe thi

ab nahin koi kami 'ishq ke afsane mein

wahi shai jo abhi mina mein thi ek mauj-e-nashat

wahi tufan-e-tarab ban gai paimane mein

qaul wa'iz ka baja shaiKH ki talqin durust

dil-e-kafir kahin aae bhi to samjhane mein

qaid-e-hasti ko samajhta hai junun ki tauhin

ab to kuchh hosh ke andaz hain diwane mein

shukr ban jate hain aate hi zaban tak shikwe

jaane kya baat hai us aankh ke sharmane mein

kis tarah hazrat-e-wa'iz ko ye samjhaun 'rashid'

rind kya dekh liya karte hain paimane mein