shauq-e-dil hasrat-e-didar se aage na baDha

shauq-e-dil hasrat-e-dīdār se aage na baḌhā

maiñ kabhī jalva-gah-e-yār se aage na baḌhā

mahram-e-rāz-e-haqīqat use samjheñ kyūñkar

ishq meñ jo rasan-o-dār se aage na baḌhā

nañg hai ishq meñ rāhat talabī ai ġhāfil

tausan-e-umr ġham-e-yār se aage na baḌhā

ḳhuld ko ham bhī samajhte haiñ magar ai vaa.iz

ḳhuld ko kūcha-e-dildār se aage na baḌhā

maiñ ne kyā kyā na kiyā ahd-e-vafā par isrār

vo faqat va.ada-e-har-bār se aage na baḌhā

bandisheñ ka.aba kī qible kā ta.ayyun be-kār

merā sajda qadam-e-yār se aage na baḌhā

hashr meñ aur bhī the mujrim-e-ulfat lekin

koī bhī tere gunahgār se aage na baḌhā

zindagī apnī thī ik vaqfa-e-taskīn-e-nafas

jo kabhī vaqt kī raftār se aage na baḌhā

kaam nashtar kā hai paivast rag-e-jāñ honā

vo bhī to abrū-e-ḳhamdār se aage na baḌhā

kis qadar josh pe thī sāhil-o-tūfāñ kī kashish

merā beḌā kabhī mañjdhār se aage na baḌhā

rah ga.e do hī qadam jal ke hazāroñ fitne

koī fitna tirī raftār se aage na baḌhā

ek do jaam meñ sab ho ga.e be-ḳhud saaqī

koī bhī 'afqar'-e-mai-ḳhvār se aage na baḌhā

shauq-e-dil hasrat-e-didar se aage na baDha

main kabhi jalwa-gah-e-yar se aage na baDha

mahram-e-raaz-e-haqiqat use samjhen kyunkar

ishq mein jo rasan-o-dar se aage na baDha

nang hai ishq mein rahat talabi ai ghafil

tausan-e-umr gham-e-yar se aage na baDha

KHuld ko hum bhi samajhte hain magar ai waiz

KHuld ko kucha-e-dildar se aage na baDha

main ne kya kya na kiya ahd-e-wafa par israr

wo faqat wada-e-har-bar se aage na baDha

bandishen kaba ki qible ka tayyun be-kar

mera sajda qadam-e-yar se aage na baDha

hashr mein aur bhi the mujrim-e-ulfat lekin

koi bhi tere gunahgar se aage na baDha

zindagi apni thi ek waqfa-e-taskin-e-nafas

jo kabhi waqt ki raftar se aage na baDha

kaam nashtar ka hai paiwast rag-e-jaan hona

wo bhi to abru-e-KHamdar se aage na baDha

kis qadar josh pe thi sahil-o-tufan ki kashish

mera beDa kabhi manjdhaar se aage na baDha

rah gae do hi qadam jal ke hazaron fitne

koi fitna teri raftar se aage na baDha

ek do jam mein sab ho gae be-KHud saqi

koi bhi 'afqar'-e-mai-KHwar se aage na baDha