shauq tadad ya miqdar nahin ho sakta

shauq tā'dād yā miqdār nahīñ ho saktā

mustanad 'ishq kā me'yār nahīñ ho saktā

ruuh meñ lams kī lazzat hai utarne vaalī

ab to is vasl se inkār nahīñ ho saktā

pattharoñ meñ tujhe hiirā nahīñ aatā hai nazar

tū mire dil kā ḳharīdār nahīñ ho saktā

is taraf se kabhī pahle koī guzrā hī nahīñ

dost ye rāsta hamvār nahīñ ho saktā

aa.ina ban nahīñ saktā hai mirā ham-āvāz

'aks pairāya-e-iz.hār nahīñ ho saktā

jab nazar kuchh nahīñ aatā hai to kah dete haiñ

koī manzar pas-e-dīvār nahīñ ho saktā

haal jaisā bhī ho māhaul banā letā hai

dil qalandar ho to bezār nahīñ ho saktā

nā-gahānī kī hai bas ek hī mushkil 'āsim'

aadmī vaqt pe tayyār nahīñ ho saktā

shauq ta'dad ya miqdar nahin ho sakta

mustanad 'ishq ka me'yar nahin ho sakta

ruh mein lams ki lazzat hai utarne wali

ab to is wasl se inkar nahin ho sakta

pattharon mein tujhe hira nahin aata hai nazar

tu mere dil ka KHaridar nahin ho sakta

is taraf se kabhi pahle koi guzra hi nahin

dost ye rasta hamwar nahin ho sakta

aaina ban nahin sakta hai mera ham-awaz

'aks pairaya-e-izhaar nahin ho sakta

jab nazar kuchh nahin aata hai to kah dete hain

koi manzar pas-e-diwar nahin ho sakta

haal jaisa bhi ho mahaul bana leta hai

dil qalandar ho to bezar nahin ho sakta

na-gahani ki hai bas ek hi mushkil 'asim'

aadmi waqt pe tayyar nahin ho sakta