شوق تعداد یا مقدار نہیں ہو سکتا

شوق تعداد یا مقدار نہیں ہو سکتا

مستند عشق کا معیار نہیں ہو سکتا

روح میں لمس کی لذت ہے اترنے والی

اب تو اس وصل سے انکار نہیں ہو سکتا

پتھروں میں تجھے ہیرا نہیں آتا ہے نظر

تو مرے دل کا خریدار نہیں ہو سکتا

اس طرف سے کبھی پہلے کوئی گزرا ہی نہیں

دوست یہ راستہ ہموار نہیں ہو سکتا

آئنہ بن نہیں سکتا ہے مرا ہم آواز

عکس پیرایۂ اظہار نہیں ہو سکتا

جب نظر کچھ نہیں آتا ہے تو کہہ دیتے ہیں

کوئی منظر پس دیوار نہیں ہو سکتا

حال جیسا بھی ہو ماحول بنا لیتا ہے

دل قلندر ہو تو بیزار نہیں ہو سکتا

ناگہانی کی ہے بس ایک ہی مشکل عاصمؔ

آدمی وقت پہ تیار نہیں ہو سکتا