شدت غم سے جو خاموش زباں ہوتی ہے

شدت غم سے جو خاموش زباں ہوتی ہے

دل کی ہر بات نگاہوں سے بیاں ہوتی ہے

یہی شبنم جو گل و غنچہ کی جاں ہوتی ہے

بعض اوقات گلستاں پہ گراں ہوتی ہے

بس وہیں ساحل امید ابھر آتا ہے

کشتئ دل بہ خوشی غرق جہاں ہوتی ہے

اہل دل اہل یقیں اہل عمل کے آگے

راہ دشوار بھی دشوار کہاں ہوتی ہے

کشتیٔ عمر ہے طوفان حوادث میں مگر

غرق ہوتی ہے یہ ظالم نہ رواں ہوتی ہے

ہم تو دیوانۂ منزل ہیں ہمیں کیا معلوم

صبح ہوتی ہے کہاں شام کہاں ہوتی ہے

کہہ دو گلچیں سے کہ پھولوں کو سنبھل کر توڑے

انہیں پھولوں میں نہاں برق تپاں ہوتی ہے