shisha-e-dil par utar jaana kisi taswir ka

shīsha-e-dil par utar jaanā kisī tasvīr kā

aah tanhā baiTh kar phir sochnā taqdīr kā

ek dil thā jo nishāna ho gayā dil-gīr kā

ik dukhī darvesh se kyā pūchhnā jāgīr kā

'zain' par ġhālib huā hai imtihāñ tāsīr kā

naqsh fariyādī hai kis kī shoḳhi-e-tahrīr kā

jab asīrī kī hadeñ mā'lūm karne meñ lagā

zā.iqa ḳhūrāk se aane lagā zanjīr kā

pyaar chhoḌeñ sāhib-e-dīnār ho gar jeb-e-dil

daf'atan ho jā.egā hal mas.ala tasḳhīr kā

ātish-e-dil kī ziyā se dī añdhere ko shikast

ḳhud pe yuuñ kholā hai maiñ ne rāsta tanvīr kā

vo ishāra de ga.e bā’d-az-zuhūr-e-rāz-e-dil

dekh kar merī taraf phir dekhnā shamshīr kā

shisha-e-dil par utar jaana kisi taswir ka

aah tanha baiTh kar phir sochna taqdir ka

ek dil tha jo nishana ho gaya dil-gir ka

ek dukhi darwesh se kya puchhna jagir ka

'zain' par ghaalib hua hai imtihan tasir ka

naqsh fariyaadi hai kis ki shoKHi-e-tahrir ka

jab asiri ki haden ma'lum karne mein laga

zaiqa KHurak se aane laga zanjir ka

pyar chhoDen sahib-e-dinar ho gar jeb-e-dil

daf'atan ho jaega hal masala tasKHir ka

aatish-e-dil ki ziya se di andhere ko shikast

KHud pe yun khola hai main ne rasta tanwir ka

wo ishaara de gae ba’d-az-zuhur-e-raaz-e-dil

dekh kar meri taraf phir dekhna shamshir ka