shikasta chehron ko dekhne ke safar mein hun main

shikasta chehroñ ko dekhne ke safar meñ huuñ maiñ

ajab tilismī musāfirat ke ḳhatar meñ huuñ maiñ

vo chāñd hai to use ujāloñ kī kyā kamī hai

ye baḳht merā ki phir bhī us kī nazar meñ huuñ maiñ

havā kabhī shaam jañgaloñ se guzar ho terā

to us se kahnā milo ki bād-e-sahar meñ huuñ maiñ

havā tire haath meñ kahāñ aa sakūñgā ab ke

na rāstoñ se guzar hai merā na ghar meñ huuñ maiñ

vo mujh meñ hai jo mujhe nikālegā uljhanoñ se

'naved' sadiyoñ se ḳhvāhishoñ ke bhañvar meñ huuñ maiñ

shikasta chehron ko dekhne ke safar mein hun main

ajab tilismi musafirat ke KHatar mein hun main

wo chand hai to use ujalon ki kya kami hai

ye baKHt mera ki phir bhi us ki nazar mein hun main

hawa kabhi sham jangalon se guzar ho tera

to us se kahna milo ki baad-e-sahar mein hun main

hawa tere hath mein kahan aa sakunga ab ke

na raston se guzar hai mera na ghar mein hun main

wo mujh mein hai jo mujhe nikalega uljhanon se

'nawed' sadiyon se KHwahishon ke bhanwar mein hun main