شکستہ چہروں کو دیکھنے کے سفر میں ہوں میں

شکستہ چہروں کو دیکھنے کے سفر میں ہوں میں

عجب طلسمی مسافرت کے خطر میں ہوں میں

وہ چاند ہے تو اسے اجالوں کی کیا کمی ہے

یہ بخت میرا کہ پھر بھی اس کی نظر میں ہوں میں

ہوا کبھی شام جنگلوں سے گزر ہو تیرا

تو اس سے کہنا ملو کہ باد سحر میں ہوں میں

ہوا ترے ہاتھ میں کہاں آ سکوں گا اب کے

نہ راستوں سے گزر ہے میرا نہ گھر میں ہوں میں

وہ مجھ میں ہے جو مجھے نکالے گا الجھنوں سے

نویدؔ صدیوں سے خواہشوں کے بھنور میں ہوں میں