شکستہ حال سفینہ سنبھالنے والا

شکستہ حال سفینہ سنبھالنے والا

کوئی نہیں ہے بھنور سے نکالنے والا

کوئی نہیں ہے تری یاد تیرے غم کے سوا

عذاب گردش دوراں کو ٹالنے والا

نواز دے جسے چاہے بہ یک نگاہ کرم

گماں کو نقش حقیقت میں ڈھالنے والا

نفس نفس کے عمل کا حساب رکھتا ہے

وہ سطح بحر سے پانی اچھالنے والا

خود اپنے حال سے بیگانہ ہوتا جاتا ہے

جہاں کے درد کو سینے میں پالنے والا

کسی کے حسن نے چھوڑا کہاں ہے کب کوئی

متاع ہوش و خرد کو سنبھالنے والا

ہمیں تو تھے جو سنبھالے تھے نظم مے خانہ

اب آگے کون ہے اس کو سنبھالنے والا

طلوع ہوگا وہ سورج تو ہوگا مشرق سے

کرن کرن سے زمیں کو اجالنے والا

سخن میں حرف و حکایت کے گوہر نایاب

وہی تو ہے مری جھولی میں ڈالنے والا

دلاسے دیتے ہیں کیا کیا ہم اہل اردو کو

مگر کوئی نہیں ہونی کو ٹالنے والا