shola-e-dard ko ashkon se bujhaya humne

sho'la-e-dard ko ashkoñ se bujhāyā ham ne

ātish-e-dil ko magar aur jalāyā ham ne

vahshat-e-'ishq meñ ḳhud ko hī sazā.eñ dī haiñ

aap ke saath jahāñ ġhair ko paayā ham ne

jaise ḳhud apne hī likkhe ko miTā.e koī

apne armānoñ ko is tarah miTāyā ham ne

aaj ham duniyā kī nazroñ meñ faqat bojh bane

kal thā duniyā kā har ik bojh uThāyā ham ne

shikve apnoñ se baḌhe itne ki 'sāgar' ik din

ḳhud-ba-ḳhud phūñk diyā apnā hī saayā ham ne

sho'la-e-dard ko ashkon se bujhaya hum ne

aatish-e-dil ko magar aur jalaya hum ne

wahshat-e-'ishq mein KHud ko hi sazaen di hain

aap ke sath jahan ghair ko paya hum ne

jaise KHud apne hi likkhe ko miTae koi

apne armanon ko is tarah miTaya hum ne

aaj hum duniya ki nazron mein faqat bojh bane

kal tha duniya ka har ek bojh uThaya hum ne

shikwe apnon se baDhe itne ki 'sagar' ek din

KHud-ba-KHud phunk diya apna hi saya hum ne